१.
संपली नाही लढाई;
रे नका वाटू मिठाई.
सूर्य झाला भीम अमुचा;
चंद्र झाली अन्‌ रमाई.
तोच मोठ्ठा संत झाला;
काल होता जो कसाई.
शिक्षणाने घात केला;
सर्व बनले डॉन, भाई.
आसवे, तिरडी व खांदे;
एवढी उरते कमाई!
२.
पदव्यांचा वाहत आहे भार हल्ली;
मी आहे शिक्षित, पण बेकार हल्ली.
जागोजागी संसर्गासम पसरला;
पैसे खाण्याचा हा आजार हल्ली.
शत्रूंपेक्षाही वरचढ मित्र झाले;
छातीतच करतात सरळ वार हल्ली.
एकांताच्या तिमिरामध्ये उभा मी;
छायेचाही ना मज आधार हल्ली.
'पैसा आहे कल्पतरू' या युगाने-
अमुच्यावर केला हा संस्कार हल्ली!
कोणत्याही टिप्पण्‍या नाहीत:
टिप्पणी पोस्ट करा